मेस्सीको पत्नी कारण पनि बार्सिलोना फिर्ता हुन सक्छन् !
एजेन्सी – अर्जेन्टिनी स्टार लियोनेल मेस्सीकी पत्नी एन्टोनेला रोकुज्जो बार्सिलोना फिर्ता हुने पक्षमा रहेको दावी बाहिरिएको छ। स्पेनबाट प्रकाशित हुने विभिन्न खेल मिडियाहरुले एन्टोनेला बार्सिलोना फिर्ता हुने पक्षमा रहेको दावी गरेका हुन्।
यस्तै सो खबरलाई स्पेनिस पत्रकार जेरार्ड रोमेरोले पनि पुष्टि गरेका छन्। आफ्ना छोराहरुका लागि बार्सिलोना ठीक हुने एन्टोनेलाको निर्णय रहेको र उनले नै मेस्सीलाई बार्सिलोना फिर्ता हुन दबाब दिएको रोमेरोको भनाई छ।
मेस्सीले लामो समय बार्सिलोनामा बिताएका थिए। बार्सिलोनामा डेढ दशक भन्दा लामो समय रहेका कारण उनको परिवार सोहि शहरसँग बढी नजिक छ। सोहि कारणले गर्दा एन्टोनेलाले मेस्सीलाई बार्सिलोना फिर्ता हुन सुझाव दिरहेको बताइन्छ।
सोमबार मात्रै मेस्सीका पिता जर्ज मेस्सी र बार्सिलोना अध्यक्ष जोआन लापोर्टा बीच भेट भएको थियो। लालिगाले मेस्सी भित्र्याउन अनुमति दिएसंगै भएको सो भेटघाट सकारात्मक गएको विभिन्न खेल मिडियाहरु बताउँछन्।
