यूएईसँग पुन: भिड्दै नेपाल

 नेपालले आईसिसी विश्वकप लिग–२ त्रिकोणात्मक ओडिआई सिरिज अन्तर्गत आज घरेलु टोली संयुक्त अरब इमिरेट्स (युएई) सँग पुन: खेल्दैछ । खेल नेपाली समय अनुसार बिहान ११ः१५ मा दुबई इन्टरनेशनल क्रिकेट स्टेडियममा सुरु हुनेछ ।

नेपालको कप्तानी सन्दीप लामिछाने र युएईको अहमद राजाले गर्नेछन् । नेपालले पहिलो खेलमा पपुवा न्युगिनीलाई २ विकेटले हराउँदा दोस्रो खेलमा युएईसँग ४८ रनले पराजित भएको थियो ।

युएईले भने पहिलो खेलमा पपुवा न्युगिनीलाई ७ विकेटले हराउँदा दोस्रो खेलमा ६ विकेटले स्तब्ध भएको थियो ।

नेपाल १० खेलमा ५ मा जित र ५ मा हार सहित १० अंकका साथ छैटौं स्थानमा छ । युएई १७ खेलमा ९ मा जित र ६ मा हारका साथ २० अंक जोड्दै दोस्रो स्थानमा छ ।

नेपाल र युएईबीच पाँच ओडिआई खेल भएको छ । नेपाल २ खेलमा विजयी हँदा ३ खेलमा पराजित भएको छ ।

नेपालले अन्तिम खेल मंगलबार पपुवा न्युगिनीसँग खेल्नेछ । त्यसपछि तीन दिनपछि नेपाल र पपुवा न्युगिनीबीच दुई ओडिआई सिरिज हुनेछ । त्यो लगत्तै नेपाल, मलेसिया र पपुवा न्युगिनीबीच त्रिकोणात्मक टि२० आई सिरिज हुनेछ ।