प्रधानमन्त्री देउवा जसरी पनि एमसीसी पारित गराउने तयारीमा
अमेरिकी मिलेनियम च्यालेन्ज कर्पोरेसन (एमसीसी) संसद्बाट पारित गर्ने विषयलाई लिएर अहिले सत्ता गठबन्धनमा किचलो सुरु भएको छ ।
प्रधानमन्त्री शेरबहादुर देउवाको तयारी र भेटवार्ताले गठबन्धनका मुख्य नेताहरु माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधवकुमार नेपाल सशंकित बनेका छन् ।
विशेष गरेर प्रधानमन्त्री निकट नेताहरुले दिएको जानकारीअनुसार प्रधानमन्त्री देउवा जसरी पनि एमसीसी पारित गराउने तयारीमा छन् ।
उनले गठबन्धनमा रहेका नेताहरुले नमाने पनि संसद्मा लैजाने पास वा फेल जे भए पनि संसद्ले नै गर्ने तयारी गरेको ती नेताले जानकारी दिए ।
प्रधानमन्त्री देउवा फागुन २ गते बोलाइएको बैठकमा जसरी पनि एमसीसी अघि बढाउने तयारीमा छन् ।
बुधबारको संसद् बैठकमै एमसीसी सम्झौता टेवल गर्ने तयारीमा रहेका प्रधानमन्त्री देउवाले सत्ता गठबन्धनका दल सहमत नहुँदा फागुन २ गतेसम्मका लागि बैठक सार्न लगाएका थिए ।
प्रतिनिधिसभाको बैठक आगामी फागुन २ गतेका लागि तोकिएको छ ।
“प्रधानमन्त्री आगामी संसद् बैठकमा एमसीसी सम्झौता टेवुल गर्ने पक्षमा हुनुहुन्छ,” प्रधानमन्त्री देउवा निकटका एक नेताले भने, “एमसीसी टेबुल गर्न सत्ता गठबन्धनकै दलहरु तयार छैनन् ।
त्यसैले केही दिन समय राखेर संसद् बैठक सारिएको हो ।” ती नेताका अनुसार सत्ता गठबन्धनका दल सहमत नभए पनि फागुन २ गतेको बैठकमा एमसीसी सम्झौता टेवुल हुन्छ ।
“एमसीसी सम्झौता फेल हुन्छ भने संसद्बाटै हुन्छ तर, प्रधानमन्त्री एमसीसी सम्झौता संसद्मा जसरी पनि टेबुल गर्ने पक्षमा हुनुहुन्छ,” ती सांसदले भने, “त्यसैले आगामी संसद् बैठकसम्म सत्ता गठबन्धनका दलहरुलाई फकाउने, थर्काउने र गलाउने प्रयासमा उहाँ हुनुहुन्छ ।”
उनले त्यस्तो प्रयासमा पनि प्रधानमन्त्री सफल नभए सत्ता गठबन्धन भत्कन सक्ने संकेत गरे ।
“राष्ट्रिय विकासको एजेन्डामा सहमत हुनुभएन भने सत्ता गठबन्धनकै औचित्य समाप्त हुन्छ, त्यसपछि यो गठबन्धनले निरन्तरता पाउने सम्भावना हुँदैन,” ती सांसदले भने, “त्यसपछि फरक विकल्पका विषयहरुमा बहस सुरु हुन्छ ।”
