क्यामिला बेलायतको भावी महारानी बन्ने निश्चित
बेलायतकी महारानी एलिजावेथ द्वितीयाले आफूले युवराज चार्ल्स राजा बन्ने बेला उनकी पत्नी तथा डचेज अफ कोर्नवाल क्यामिला महारानी बनून् भन्ने चाहेको स्पष्ट पारेकी छन् ।
आफूले राजगद्दी आरोहण गरेको ७०औँ वर्षगाँठका अवसरमा मुलुकका नाममा प्रसारित सन्देशमा एलिजावेथले सो मनसाय व्यक्त गरेकी हुन् ।
यसअघिसम्म क्यामिलालाई युवराजकी पत्नीको मात्र परिचय दिइने अनुमान गरिएको थियो । तर, एलिजावेथको यस औपचारिक घोषणापछि अब उनी बेलायतको भावी महारानी बन्ने निश्चित भएको छ ।
क्लारेन्स हाउसका प्रवक्ताले एलिजावेथको यस घोषणाबाट प्रिन्स अफ वेल्स र डचेज अफ कोर्नवालले सम्मानित र खुसी भएको महसुस गरेको बताएका छन् । एलिजावेथ सन् १९५२ मा महारानी बनेकी थिइन् ।
बेलायती शाही परम्पराअनुसार महारानीकी पतिलाई छुट्टै किसिमले सम्बोधन गर्ने गरिन्छ ।
महारानी एलिजावेथका पति राजकुमार फिलिप र महारानी भिक्टोरियाका पति राजकुमार अल्वर्ट राजाका रूपमा नभई राजकुमार पतिको परिचयबाट मात्र चिनिँदै आएका छन् ।
अब क्यामिलाको महारानी बन्ने सौभाग्य नरोकिने भएको छ । सन् २००५ मा दुवै पारपाचुके प्राप्त अवस्थामा चार्ल्स र क्यामिलाबीच कानुनी रूपमा विवाह भएको थियो ।
त्यसअघि, चार्ल्सका युवराज्ञी डायनासँग विवाह भएको थियो । डायनाको फ्रान्सको राजधानी पेरिसमा एउटा कार दुर्घटनामा मृत्यु हुनु एक वर्षअघि अर्थात् सन् १९९६ मा यी दुईबीच सम्बन्धविच्छेद भएको थियो । एजेन्सी
