काठमाडौँ — प्रमुख प्रतिपक्षी कांग्रेसले हालैमात्र सरकारबाट बाहिरिएको समाजवादी पार्टीसँग चुनावी तालमेल गर्ने संकेत दिएको छ । माघ ९ गते हुने राष्ट्रियसभा निर्वाचनमा सरकारको विपक्षमा रहेका सबै दलहरुसँग तालमेलको ढोका खोल्ने गरी बिहीबारको कांग्रेस केन्द्रीय समितिले निर्णय गरेको हो ।

‘विपक्षमा रहेका सबै दलहरु एकजुट भएर सरकारका गलत कामकारबाहीको विरोध गर्नु जुरुरी छ,’ कांग्रेस प्रवक्ता विश्वप्रकाश शर्माले भने, ‘राष्ट्रियसभा निर्वाचनमा पनि विपक्षमा रहेका दलहरु एकजुट हुनु आवश्यक छ । त्यसका लागि कांग्रेसले सबै विकल्प खुला गरेको हो ।’