कोपा अमेरिका फुटबल प्रतियोगिताको सेमिफाइनल समिकरण पूरा
काठमाडौं – कोपा अमेरिका फुटबल प्रतियोगिताबाट उरुग्वे बाहिरिएको छ । आइतबार बिहान भएको खेलमा उरुग्वे पेरुसंग पेनाल्टी सुटआउटमा पराजित हुँदै प्रतियोगिताबाट बाहिरिएको हो ।
निर्धारित समयको खेल गोल रहित बराबरीमा सकिएपछि खेल पेनाल्टी सुटआउटमा धकेलिएको थियो । पेनाल्टी सुटआउटमा उरुग्वे पेरुसँग ५–४ ले पराजित भयो ।
स्पेनिस महारथी क्लब बार्सिलोनाका स्टार लुईस स्वारेजको पेनाल्टी प्रहार असफल बन्दा उरुग्वे पेनाल्टी सुटआउटमा पराजित भएको हो ।
पेरुका लागि इडिसन फ्लोरेस, लुइस एड्भिन्कुला, योसिमार योटिन, राउल रुइडियज र पाओलो गुरेरोले प्रहार गरेको पेनाल्टी गोलमा परिणत भएपछि पेरुले उरुग्वेमाथि जित हात पारेको हो ।
यस्तै, उरुग्वेका लागि लुइस स्वारेजबाहेक ४ जना खेलाडीले प्रहार गरेको पेनाल्टी गोलमा परिणत भएको थिए । जसमा लुकास टोरिरा डे पासुका, रोड्रिगो बेन्टानकुर, क्रिष्टियन स्टुआन रइडिनसन काभानिले गोल गरेका थिए ।
१५ पटकको कोपा अमेरिका फुटबल च्याम्पियन उरुग्वे क्वाटरफाईनलमै पराजित हुँदै प्रतियोगिताबाट बाहिरिएको हो ।
सेमिफाईनल प्रवेश गरेको पेरुले सेमिफाईनलमा चिलीसंग प्रतिस्पर्धा गर्नेछ । आयोजक ब्राजिलले अर्जेन्टिनासंग खेल्नेछ । योसँगै कोपा अमेरिकाको सेमिफाइन्ल समिकरण पुरा भएको छ । जसमा अर्जेन्टिनाले ब्राजिल र पेरुले चिलीसँग खेल्नेछ ।
