देशको हितलाई हेरेर बजेट ल्याउनुपर्ने अर्थमन्त्री डा. युवराज खतिवडालाई सुझाव
व्यवस्थापिकाको अर्थसमितिमा बोल्दै पूर्वअर्थमन्त्रीहरुले पार्टीको भन्दा पनि समग्र देशको हित हेरेर बजेट ल्याउँदा कहिलेकाही अलोकप्रिय हुने हिम्मत राख्न अर्थमन्त्री डा. युवराज खतिवडालाई सुझाव दिएका हुन् ।
पूर्व अर्थमन्त्री डा. बाबुराम भट्टराईले बजेट निर्माण गर्दा राजनीतिक र आर्थिक विरोधाभाष हुने भएकाले तत्कालको हितभन्दा पनि देशको हितलाई हेरेर बजेट ल्याउनुपर्ने र पपुलिष्ट भन्दा पनि अलोकप्रिय हुने हिम्मत राख्न सक्नुपर्ने सुझाव दिए ।
उनले भने, ‘हुन त यो सरकारको एक बर्षका निकै आलोचना भएकाले अब पपुलिष्ट बजेट ल्याउने अवस्थामा पुगेको उसको नीति तथा कार्यक्रमले देखाएको छ । तर देशको हितको लागि भएपनि लोकप्रियता र संरचनागत परिवर्तनबीचको समन्वयमा ध्यान पुगोस् ।’
अर्का पूर्वअर्थमन्त्री सुरेन्द्र पाण्डे र ज्ञानेन्द्र बहादुर कार्कीले पनि लोकप्रियताको पछि नलाग्न सुझाएका छन् । सुरेन्द्र पाण्डेले विद्यमान नीतिगत व्यवस्थाको परिवर्तन अबको आवश्यकता भइसकेको बताए ।
यसका लागि सरकारले अबको बजेट मार्फत व्यवस्था गर्नुपर्ने उल्लेख गरे । सबैको चित्त बुझाउने तर उपलब्धि केही नहुने गरी आजसम्मको बजेट आएको भन्दै अबको बजेटमा त्यस्तो नगर्न पनि सुझाए ।
यता पूर्वअर्थमन्त्री ज्ञानेन्द्र कार्कीले ठुला र महत्वका आयोजनामा मात्र बजेट बिनियोजन गर्न र जथाभावी बजेट छर्ने प्रथाको अन्त्य गर्न सुझाव दिए ।
