Logo

बजुको अन्तिम कथा


 -भाई किराती 

सुनाउनु भो कथा बजुले,

हल्लिँदै छाल झैँ मधुर स्वरमा,

रोकेर केही क्षण घडीको सेकेन्ड सुई

 

“घोत्लिएर सम्झी त नाती !

नपारेको त कहाँ थियो र मलाई पनि ?

छिया-छिया

तीनका जम्मै अस्त्रहरुले

 

तर त मुलाङलाई बचाए

गुट्मुट्याएरै फरियाई भित्र

क्रूर कालीपल्टनको

सैतानी हर्कतहरुबाट

स्वीकार्दै छेद्-बिच्छेदताको हनिमुन

 

सिरिङ्ग हुन्छ आङ्ग, सम्झँदा पनि

निन्द्राबाटै ब्युँझिने गरि

 

बाँकी भेटे जत्ती पार्दै चिरा-चिरा

कलिला ज्यानहरुमा

नचाए तरवार मनलागी वारपार

त्यत्ती मात्रै कहाँ हो र ?

मिल्काईदिए लुछी-लुछी

पाठेघरको जुइनोसँगै पो

 

नबुझेर चित्त बलात्कारले

चोक्टाहरु छरस्टै स्तनका

संगीन त कत्ति धसे कत्ति

काठका छड्केहरु नै

किलो झैँ ठोक्न भ्याए योनीमा

खै कहिलेको, केको बदला थियो कुन्नी ?

 

देखेको छु मैले ता वावै !

आयो..यो !

त्यो बन्दुकमा सिउरिएको

धारे भालाको छेदन मात्र कहाँ होर ?

 

घुसारेरै खुनी हात बलैले

अन्तिम चीत्कार एकोहोरो

सिर्रर सिर्रर रगतको सिर्काहरुसँगै

गर्भिणी आमाहरुको योनीबाट निकाल्दै

फुत्त-फुत्त फालेर भुइँ भरी छरपस्ट

मनाए महान विजय महोत्सव

ओभाउँनै लागेको रगतका

निराकार ङ्यालदुङ डल्लाहरुको

बिभत्सता माथि

 

त्यस्को के जान्थ्यो र ?

आमा पट्टीको, न बाउ पट्टीको !

लोग्नेमान्छे त बाँकी नै थिएन

मार्नलाई कोही”

 

ए प्यारो नाती,

हिड्दैछस अहिले कुन बाटो हँ ?

के खाँदैछस ?

जे खायो त्यही हग्ने त हो !

 

छाडिराखे झैँ आफ्नो गुँड

हुर्केपछि बचेराले

छोडेउ चटक्कै थातथलो पनि

भुलिहालेउ त खेतीपाती गर्नु

सकियो त भएभरको सिटोपिठो

 

कति बाँच्छस अरुको भरमा,

बोकि बोकि, गुदी कुहाएर सिंगारिएको बोक्रा

जोगाएर माई क्लीएर ब्यागसँगै

लाग्छस अरुकै लहै-लहैमा,

सिँगार्छस अरुको हावादारी दोकान ?

चास्न थाल आफ्नो खपिताउलोहरु नै बरु

जोड्दी राखेकै छन त वाउ बाजेले

 

भेटिनेछ त्यहाँ

भावी दर सन्तानको लागि भनेर

च्याब्जुले जोहो गर्दिराखेको गाड्धन

र त्यो पुँजीको शक्तिमा मिसाउ

आफ्नो नयाँ विवेक

अनि जुटाउ दस औंलाको मुठी

 

गर आगोको नयाँ आविस्कार

ओकल आगोको ज्वालै-ज्वाला

र पारिदेउ ध्वस्त

बित्तण्डावादी राजनीतिक दर्शन

डिलिट गर त्यो

मेमोरि कार्डको सारा भाइरसहरु

अनि उभ,

उभ, बदलिँदो सामाजिक परिवेशको

वास्तविक धरातलमा ।

 

अचानक चल्न थाल्यो घडीको सुई

निदाउनु भो बजु सदाको लागि !

सुन्नु थ्यो अरु धेरै कथा ढिलो भएछ ।

Key Alternative Media

Best selling an amazon. Buy now ! good for you

प्रतिक्रिया दिनुहोस्