तीजे गीत-डा भक्त राई

बङ्गुर खान छोड्छु अब तिमी खसी छोड
ठूलो सानो जातिवादी अन्धविश्वास तोड
तीजमा लाउनु रातो सारी साकेलामा छिर्के
तिम्रै लागि छोडीदिन्छु आजै खोया बिर्के

तिमी पूज तुलसीलाइ म पूज्छु चुला
पूजा-आजा भन्दा पनि कर्म गरौँ ठूला
म लाँउछु सेतो टीका तिमी लाउनु रातो
धर्म कर्म आआफ्नै छ जाने एउटै बाटो

तीज मान्न नजाउ माइती रिसाको छन ऐले
दुबैजना सङ्गै जाँउला बोलाउँछन जैले ।
लाज शरम नमान ल मेरो काख्मा हुँदा
काउकुती लाग्न सक्छ पहिलो पटक छुँदा ।

छिर्के= राई जातिको महिलाले लाउने छिर्के सारी
खोया बिर्के= कोदोको रक्सी जस्लाइ बोतलमा खोयाको बिर्को लागाएर राखिन्छ ।
चुला= तीन ओटा ढुङ्गालाई विधिपूर्वक गाडेर बनाइएको किरात जातिको आस्थाको केन्द्र चुल्हो ।