भीभीआईपी बिम्स्टेकका पाहुनाको बास कता?
काठमाडौं : यही भदौ १४ र १५ गते बिम्स्टेकको चौथो शिखर सम्मेलनका लागि सात देशका सरकार तथा राष्ट्रप्रमुखहरु नेपाल आउँदै छन्। उनीहरुको सुरक्षा र बासको व्यवस्थाको सरकारले तयारी पूरा गरेको छ।
सम्मेलनमा सहभागी हुन आउने डेलिगेट्सहरुको ‘लोकल हस्पिटालिटी’को व्यवस्था आयोजक राष्ट्रले व्यहोनुपर्ने बिम्स्टेकको अभ्यास अनुरुप नेपालले सम्मेलनमा सहभागी हुन आउने भीभीआईपी तथा अन्य डेलिगेट्सहरुको बास, खानपिन तथा अन्य बन्दोबस्ती काठमाडौंका विभिन्न तारे होटलहरुमा गरेको छ।
सम्मेलनमा सहभागी हुन आउने डेलिगेट्स प्रमुख (सरकार वा राष्ट्रप्रमुख), उनका प्रथम (महिला वा पुरुष) तथा अन्य दुई सहयोगीका लागि नेपालले भदौ १३ देखि भदौ १५ सम्मको बासको व्यवस्था गरेको छ।
त्यस्तै मन्त्रिस्तरीय बैठकमा सहभागी हुने टोलीका लागि भदौ १२ गते देखि र उच्च अधिकारी (विदेश सचिव)को बैठकमा सहभागी हुने डेलिगेट्सहरुका लागि भदौ ११ देखि १५ भदौसम्मको लागि नेपाल बसाईको व्यवस्थापकीय खर्च नेपालले व्यहोर्ने छ।
